Cynllun Datblygu Lleol Conwy 2007 - 2022

POLISI STRATEGOL DP/1 – EGWYDDORION DATBLYGIAD CYNALIADWY

1. Caniateir datblygiad yn unig lle dangosir ei fod yn gyson ag egwyddorion datblygiad cynaliadwy. Mae'n ofynnol i bob datblygiad:

1. Cydymffurfio ag arweiniad cenedlaethol yn unol â Pholisi DP/6 – ‘Canllawiau Cenedlaethol’
2. Bod yn gyson â’r dull dilyniannol a nodir ym Mholisi Gofodol DP/2 – ‘Dull Strategol Trosfwaol’;
3. Gwneud defnydd effeithlon ac effeithiol o dir, adeiladau ac isadeiledd trwy roi blaenoriaeth i ddefnyddio tir a ddatblygwyd eisoes mewn lleoliadau hygyrch, cyflawni ffurfiau cryno o ddatblygiad trwy ddefnyddio dwyseddau uwch y gellir eu haddasu yn y dyfodol; yn unol â Pholisi DP/2 a pholisïau cysylltiedig eraill yn y Cynllun;
4. Cadw neu wella ansawdd adeiladau, safleoedd a mannau o bwysigrwydd hanesyddol, archeolegol neu bensaernïol yn unol â Pholisi Strategol CTH/1 – ‘Treftadaeth Ddiwylliannol’.
5. Cadw neu wella ansawdd bioamrywiaeth a chynefinoedd bywyd gwyllt, a diogelu rhywogaethau a warchodir yn unol â Pholisi Strategol NTE/1 – ‘Yr Amgylchedd Naturiol';
6. Ystyried ac ymdrin â pherygl llifogydd a llygredd sŵn, golau, dirgryniadau, arogl, allyriadau neu lwch yn unol â Pholisi DP/2 a DP/3 – ‘Hyrwyddo Ansawdd Dylunio a Lleihau Troseddau';
7. Defnyddio adnoddau’n effeithiol ac yn effeithlon trwy ddefnyddio technegau adeiladu cynaliadwy sy’n cynnwys camau cadwraeth ynni a dŵr a, lle bynnag y mae hynny'n bosib, defnyddio ynni adnewyddadwy, yn unol â Pholisi DP/3 a Pholisi Strategol NTE/1.

2. Lle mae hynny’n briodol dylai cynigion datblygu hefyd

1. Ddarparu mynediad diogel a hwylus trwy gludiant cyhoeddus ar feic ac ar droed i leihau'r angen i deithio mewn ceir yn unol â Pholisi DP/2 a Pholisi Strategol STR/1- ‘'Cludiant Cynaliadwy';
2. Cynnwys camau rheoli traffig a lleihau tagfeydd yn unol â Pholisi Strategol STR/1;
3. Darparu ar gyfer isadeiledd a gwasanaethau cyhoeddus eraill sy'n ofynnol oherwydd y datblygiad, yn unol â Pholisïau DP/4 – ‘Meini Prawf Datblygu', DP/5 – ‘Isadeiledd a Datblygiadau Newydd' a Monitro a Gweithredu'r Cynllun;
4. Cael eu dylunio i safon uchel, gan fod yn ddeniadol, hwylus i'w haddasu, hygyrch, a diogel fel y nodir ym Mholisi DP/3;
5. Hyrwyddo datblygiad economaidd cynaliadwy yn unol â Pholisi Strategol EMP/1 – ‘Cwrdd â’r Angen am Gyflogaeth’;
6. Cadw neu wella ansawdd mannau agored gwerthfawr, cymeriad ac ansawdd tirweddau lleol a chefn gwlad ehangach yn unol â pholisïau strategol NTE/1 a CFS/1- ‘'Cyfleusterau a Gwasanaethau Cymunedol';
7. Ystyried ac ymdrin ag effaith bosibl newid hinsawdd yn unol â Pholisi Strategol NTE/1 – ‘Yr Amgylchedd Naturiol’;
8. amddiffyn ansawdd adnoddau naturiol cynnwys dŵr, aer a phridd yn unol â NTE1;
9. lleihau cynhyrchu gwastraff a rheoli ailgylchu gwastraff yn unol â Pholisi Strategol MWS/1 – ‘Mwynau a Gwastraff’.

Polisi DP/2 – DULL STRATEGOL TROSFWAOL

Bydd y datblygiad yn cael ei leoli yn unol â’r dull strategol trosfwaol a nodir isod:

Ardaloedd Trefol
Abergele/Pensarn, Bae Colwyn (yn cynnwys Llandrillo-yn-Rhos a Hen Golwyn, Conwy, Deganwy / Llanrhos, Llandudno, Cyffordd Llandudno, Llanfairfechan, Llanrwst, Mochdre, Penmaenmawr, Bae Penrhyn / Ochr Penrhyn a Thywyn / Bae Cinmel.

Bydd y rhan fwyaf o ddatblygiadau newydd yn digwydd o fewn ac ar gyrion yr ardaloedd trefol hyn. Dros gyfnod y cynllun bydd tua 85% o'r tai ac 85% o ddatblygiadau cyflogaeth (B1, B2 a B8) (trwy ddatblygiadau a gwblhawyd, ymrwymiadau, hap-safleoedd a dyraniadau newydd) yn cael eu lleoli'n bennaf, o fewn ac ar ymyl yr ardaloedd trefol er mwyn adlewyrchu blaenoriaethau gofodol cyfrannu at greu cymunedau cynaliadwy.

Bydd Ardaloedd Trefol yn allweddol wrth ddarparu cyfuniad o'r farchnad a Thai Fforddiadwy ar gyfer Angen Lleol (AHLN) ar safleoedd a ddyrannwyd a hap-safleoedd. Bydd ffiniau anheddiad yn cael eu haddasu i adlewyrchu'r datblygiad arfaethedig. Caniateir AHLN hefyd ar safleoedd eithrio gerllaw Llanrwst.

Prif Bentrefi
Haen 1:
Llanddulas, Dwygyfylchi*, Llysfaen, Glan Conwy

Haen 2:
Betws-yn-Rhos, Cerrigydrudion, Dolgarrog*, Eglwysbach
Llanfair Talhaearn, Llangernyw, Llansannan, Trefriw* a Thal-y-bont*/Castell

Bydd graddfa datblygiad arfaethedig y dyfodol yn adlewyrchu anghenion yr aneddiadau o safbwynt maint a swyddogaeth a'u perthynas ffisegol a swyddogaethol ag ardaloedd trefol. Mae Prif Bentrefi yn darparu gwasanaeth swyddogaethol ar gyfer y Pentrefi Bychain a Pentrefannau a bydd hyn yn cael ei gynnal a'u ddatblygu ymhellach i gwrdd ag anghenion y cymunedau. Dros gyfnod y cynllun bydd tua 15% o'r datblygiadau tai ac 15% o'r datblygiadau cyflogaeth (B1, B2 a B8) yn cael eu lleoli o fewn Prif Bentrefi, Pentrefi Bychain a Pentrefannau, ond yn bennaf ym Mhrif Bentrefi Haen 1 a Haen 2 a'u cyflenwi trwy ddatblygiadau a gwblhawyd, ymrwymiadau, hap-safleoedd a dyraniadau newydd.

Bydd Prif Bentrefi Haen 1 yn darparu cyfuniad o bris y farchnad a thai fforddiadwy ar gyfer angen lleol (AHLN). Bydd Pentrefi Haen 2 ceisio darparu 100% AHLN yn unig ar safleoedd a ddyrannwyd a hap-safleoedd o fewn terfynau’r anheddiadau. I gynnig elfen o hyblygrwydd, bydd anheddau ar y farchnad yn cael eu caniatáu dan amgylchiadau eithriadol ar safleoedd a ddyrannwyd a hap-safleoedd mewn pentrefi Haen 2 fel modd o ddarparu tai fforddiadwy ar y safle, yn amodol ar brofion ymarferoldeb ariannol. Bydd datblygiadau o’r fath ar raddfa lai na'r hyn a ganiateir mewn Ardaloedd Trefol. Ni chaniateir datblygu pellach y tu allan i ffiniau anheddiad, ac eithrio AHLN graddfa lai 100% ar safleoedd eithrio i ddiwallu angen a ddynodwyd yn unol â Pholisi HOU/6 – ‘Safleoedd Eithriad Gwledig Tai Fforddiadwy ar gyfer Anghenion Lleol' a dan amgylchiadau eithriadol i ddiwallu anghenion cyflogaeth yn unol â Pholisi EMP/3 – ‘Datblygiadau Swyddfeydd a Diwydiannol Newydd B1, B2 a B8 ar safleoedd heb eu dyrannu’.

Pentrefi Bychain
Bryn Pydew, Glanwydden, Groes, Henryd, Llanbedr-y-Cennin*, Llanddoged, Llanelian, Llangwm, Llannefydd, Pentrefelin, Pentrefoelas, Rhyd-y-foel, Rowen*, Llan San Siôr, Tal-y-cafn a Thyn-y-groes

Bydd datblygiad cyfyngedig yn digwydd yn y Pentrefi Bychain er mwyn amddiffyn cymeriad yr ardal, a chyfran at greu cymunedau cynaliadwy. Dros gyfnod y cynllun, ni ddyrennir unrhyw safleoedd tai'r farchnad neu safleoedd cyflogaeth, ac ni fydd ffiniau aneddiadau yn cael eu llunio o gwmpas y Pentrefi Bychain. Yn unol â Pholisi HOU/2, bydd y Pentrefi Bychain yn ceisio darparu 100% AHLN ar hap-safleoedd yn unig o fewn terfynau’r anheddiad neu lle bod grwpiau bychain o stadau anheddau newydd (hyd at 5 annedd) neu anheddau sengl yn cynnig ffurf o fewnlenwi ac yn gweddu’n ffisegol ac yn weledol â’r anheddiad. I gynnig elfen o hyblygrwydd, bydd anheddau ar y farchnad yn cael eu caniatáu dan amgylchiadau eithriadol ar safleoedd a ddyrannwyd a hap-safleoedd mewn pentrefi Haen 2 fel modd o ddarparu tai fforddiadwy ar y safle, yn amodol ar brofion ymarferoldeb ariannol. Mae’n bosibl y caiff safleoedd eithriad AHLN 100% eu caniatáu tu allan, ar ymyl, terfynau’r prif aneddiadau, lle mae’n diwallu angen lleol yn unol â Pholisi HOU/6.

Dan amgylchiadau eithriadol bydd datblygiadau cyflogaeth newydd B1,B2 a B8 yn cael eu caniatáu yn unol â Pholisi EMP/3.

Pentrefannau
Bodtegwel, Bryn-y-maen, Brymbo, Bryn Rhyd-yr-Arian, Bylchau, Capelulo*, Cefn Berain, Cefn Brith, Dinmael, Glan Rhyd, Glasfryn, Groesffordd, Gwytherin, Hendre, Llanelian, Llanfihangel Glyn Myfyr, Maerdy, Melin y Coed, Nebo*, Pandy Tudur, Pentre Isa, Pentrellyncymer, Pentre Isa, Pentre Tafarn-y-Fedw, Rhydlydan a Than-y-Fron

Dros gyfnod y cynllun, ni roddir dyraniadau ar gyfer datblygiadau mewn Pentrefannau. Dim ond dan amgylchiadau eithriadol y caniateir datblygiad. Un eithriad fyddai datblygiad sy’n darparu anghenion tai fforddiadwy ar gyfer anghenion lleol unigol neu gyfleoedd cyflogaeth mewn lleoliadau derbyniol a chynaliadwy.

*Yn rhannol ym Mharc Cenedlaethol Eryri.

Polisi DP/3 – HYRWYDDO ANSAWDD DYLUNIO A LLEIHAU TROSEDD

1. Bydd pob datblygiad newydd o safon uchel a’u dyluniad yn gynaliadwy, ac sy’n darparu mannau y gellir eu defnyddio diogel, parhaol a derbyniol, ac yn amddiffyn cymeriad lleol a hynodrwydd amgylchedd adeiledig hanesyddol a naturiol Ardal y Cynllun. Bydd y Cyngor yn mynnu bod datblygiad:

1. Yn addas ar gyfer ei gyffiniau ac yn eu gwella o ran ffurf, graddfa, crynswth, manylion edrychiad a’r defnydd o ddeunyddiau;
2. Yn bodloni safonau cymeradwy’r Cyngor o ran darparu mannau agored a mannau parcio;
3. Bodloni safonau gofynnol hygyrchedd, drwy roi ystyriaeth briodol i anghenion pobl o wahanol oedrannau a gallu wrth ddylunio’r cynnig;
4. Yn talu sylw i’r effaith ar eiddo cyfagos, ardaloedd a chynefinoedd sy’n cynnal rhywogaethau a ddiogelir;
5. Yn ystyried cyfeiriadedd priodol, effeithiolrwydd ynni a’r defnydd o ynni adnewyddadwy o ran dyluniad, gosodiad, deunyddiau a thechnoleg yn unol â NTE/6 – ‘Effeithlonrwydd Ynni a Thechnoleg Adnewyddadwy Mewn Datblygu;
6. Yn darparu systemau draenio trefol cynaliadwy i gyfyngu ar ddŵr gwastraff a llygredd dŵr a lleihau’r perygl o lifogydd yn unol â chanllawiau cenedlaethol a Pholisi NTE/8 – ‘Systemau Draenio Cynaliadwy;

2. Pan fo hynny’n briodol, bydd y Cyngor hefyd yn ceisio:

1. Gwella cymeriad lleol adeiladau, treftadaeth a mannau agored;
2. Darparu ar gyfer cymysgedd cydnaws o ddefnyddiau, yn arbennig yng nghanol trefi a phentrefi;
3. Ymgorffori tirlunio o fewn ac o amgylch y datblygiad, yn briodol i raddfa ac effaith y datblygiad;
4. Integreiddio a llwybrau presennol i ddarparu mannau cydgysylltiedig sy’n cysylltu â’r ardal ehangach, a chyfleusterau cyhoeddus a llwybrau cludiant gwyrdd yn enwedig;
5. Darparu datblygiadau sy’n cynnig dewisiadau cludiant amgen ac yn hyrwyddo cerdded, beicio a’r defnydd o gludiant cyhoeddus;
6. Creu mannau diogel trwy fabwysiadu egwyddorion dylunio i osgoi trosedd er mwyn darparu gwyliadwriaeth naturiol, gwelededd ac amgylcheddau wedi’u goleuo’n dda ac ardaloedd lle mae’r cyhoedd yn symud o gwmpas;
7. Sicrhau bod nodweddion bioamrywiaeth yn cael eu cadw a’u gwella;
8. Ymgorffori ardaloedd a chyfleusterau rheoli gwastraff, cronni/storio dŵr glaw, ailddefnyddio dŵr llwyd ac ailgylchu;
9. Talu sylw i Ganllawiau Mabwysiadu Ffyrdd yr Awdurdod wrth gynllunio ffyrdd.

3. Bydd y Cyngor yn gofyn am gyfraniad o ganran a gytunir arni o gyfanswm y costau datblygu i ddarparu neu gomisiynu gweithiau celf neu wella dylunio sy’n hygyrch i’r cyhoedd yn unol â DP/5 – ‘Isadeiledd a Datblygiadau Newydd’, pan fo hynny’n briodol i’w leoliad a’i hyfywedd.

Polisi DP/4 – MEINI PRAWF DATBLYGU

1. Dylai cynigion datblygu, pan fo hynny’n briodol ac yn unol â pholisïau’r Cynllun a Safonau’r Cyngor, ddarparu’r canlynol:

1. Tai Fforddiadwy ar gyfer Anghenion Lleol;
2. Mynediad diogel o’r rhwydwaith priffyrdd, a gwella’r isadeiledd cludiant cyhoeddus, beicio a cherdded;
3. Lle parcio ceir;
4. Lle diogel i barcio beiciau;
5. Man Agored;
6. Mynediad diogel a hwylus i bob adeilad a gofod cyhoeddus, yn cynnwys y bobl hynny sy’n cael trafferth i symud o gwmpas neu sydd â namau eraill ar y synhwyrau, megis ar eu golwg neu eu clyw;
7. Ardal wedi’i sgrinio ar gyfer gwastraff, yn cynnwys deunyddiau y gellir eu hailgylchu;
8. Dyluniad a gosodiad sy’n lleihau’r cyfleoedd i droseddu;
9. Cyfraniadau ariannol tuag at ddarparu a chynnal a chadw isadeiledd, gwasanaethau a chyfleusterau sy’n angenrheidiol i’r datblygiad;

2. Ni roddir caniatâd cynllunio pe byddai’r datblygiad arfaethedig yn cael effaith andwyol annerbyniol:

1. Ar amwynder preswyl;
2. Yn sgil traffig sy’n cael ei gynhyrchu;
3. Ar fuddiannau archeolegol a’r ffurf adeiledig;
4. Ar yr iaith Gymraeg;
5. Ar amodau amgylcheddol yn deillio o sŵn, golau, dirgryniad, arogl, allyriadau gwenwynig neu lwch;
6. Ar fuddiannau ecolegol a bywyd gwyllt a chymeriad y dirwedd;
7. Ar lifogydd a’r perygl o lifogydd;
8. Ar y tir amaethyddol gorau a mwyaf amlddefnydd;
9. Ar ansawdd dŵr daear neu ddŵr wyneb;
10. Ar gyfleusterau cymunedol hanfodol.

Polisi DP/5 – ISADEILEDD A DATBLYGIADAU NEWYDD

Bydd disgwyl i bob datblygiad newydd, os yw’n briodol, wneud cyfraniadau digonol tuag at isadeiledd newydd i ddiwallu gofynion isadeiledd cymdeithasol, economaidd, ffisegol ac / neu amgylcheddol ychwanegol sy’n deillio o’r datblygiad neu gynnal a chadw cyfleusterau i’r dyfodol. Ceisir cael cyfraniadau yn unol â blaenoriaethau’r Cyngor.

Polisi DP/6 – POLISÏAU A CHANLLAWIAU CYNLLUNIO CENEDLAETHOL

Mae’n rhaid i gynigion datblygu gydymffurfio â pholisïau a chanllawiau cynllunio cenedlaethol.

Polisi DP/7 – PRIF GYNLLUNIAU A GWERTHUSIADAU CYMUNEDOL

Bydd cynigion defnydd tir yn deillio o Brif Gynlluniau, Gwerthusiadau Cymunedol, neu debyg, yn cael eu cefnogi os ydynt yn:

1. Ymwneud ag Amcanion Strategol y Cynllun;
2. Ystyried polisi cenedlaethol, Cynllun Gyfodol Cymru a’r Strategaeth Gymunedol;
3. Yn gallu cael eu datblygu a’u cefnogi gan sail tystiolaeth o’r angen
4. Yn cael eu cefnogi gan Asesiad Amgylcheddol Strategol/Gwerthusiad Cynaladwyedd, lle bod hynny’n briodol;
5. Yn realistig, hyfyw a gall ddangos bod modd ei ddarparu drwy dystiolaeth atodol;
6. Yn cael eu paratoi gan ymgynghori â’r cyhoedd a chyfranogion perthnasol;
7. Cydymffurfio â pholisïau eraill cysylltiedig y Cynllun.

Polisi DP/8 – PRIF GYNLLUN ADFYWIO TREFOL BAE COLWYN

Bydd cynigion adfywio ym Mae Colwyn yn canolbwyntio ar ardal Prif Gynllun Bae Colwyn (CBMP) fel y dangosir ar y map cynigion. Cefnogir cynigion allweddol ac ymyraethau sy’n cynorthwyo amcanion adfywio trefol Bae Colwyn:

1. Creu’r amodau am fuddsoddiad a thwf economaidd a gweithgareddau cymdeithasol gwell;
2. Darparu ar gyfer tai newydd yn unol â Pholisi Strategol HOU/1 – ‘Diwallu’r angen am gartrefi’.
3. Cynyddu’r cysylltiadau â’r glan y môr, cysylltiadau dwyrain-gorllewin rhwng canol y dref, Dwyrain Colwyn a Pharc Eirias ar hyd Ffordd Abergele yn unol â Pholisi Strategaeth STR/1;
4. Darparu ar gyfer datblygiad adwerthu a masnachu canol y dref newydd yn unol â Pholisïau Strategol CFS/1 a STR/1.
5. Gwneud y mwyaf o’r cyfle a ddarperir gan Barc Eirias drwy’r Ganolfan Ddigwyddiadau newydd a’r Academi Rygbi, gyda chlystyrau pellach o gyfleusterau chwaraeon at y terfynau deheuol;
6. Cyfrannu at adeiladau ac adeileddau o bwysigrwydd lleol neu genedlaethol drwy welliannau sympathetig neu gynigion cadwraeth.
7. Darparu ar gyfer gwell datblygiad glan y môr, gan gynnwys gwaith ar yr amddiffynfeydd arfordirol a gwella’r ardal fel cyfleuster/ atyniad twristaidd a hamdden
8. Darparu ar gyfer gwell datblygiad o Ganolfan Siopa Bay View a’i chysylltiadau â chanol y dref yn unol â Polisïau Strategol CFS/1 a STR/1;
9. Creu canolbwynt newydd i ganol y dref.
10. Gwella symudiadau cerbydau a mynediad at drafnidiaeth gyhoeddus at y dref ac yn y dref, gan gynnwys canolbwynt trafnidiaeth integredig newydd yn Sgwâr yr Orsaf, ac adlinio priffyrdd a gofod cyhoeddus newydd yn unol â Pholisi Strategaeth STR/1.