Cynllun Datblygu Lleol Conwy 2007 - 2022

1. ADRAN UN - CYFLWYNIAD

1.1 Crynodeb

1.1.1 Mae Cynllun Datblygu Lleol Conwy (CDLl) yn ymwneud â’r rhan o Fwrdeistref Sirol Conwy y tu allan i Barc Cenedlaethol Eryri (a elwir yn Ardal y Cynllun). Mae Ardal y Cynllun yn gyfoethog mewn asedau hanesyddol, mae iddi ddiwydiant twristiaeth ffyniannus, cysylltiadau cludiant rhagorol, ansawdd dŵr ac aer da ac amgylchedd naturiol o ansawdd uchel (gan gynnwys arfordir a chefn gwlad). Fodd bynnag, mae’r rhagolygon poblogaeth ac aelwydydd wedi dangos gallai poblogaeth Ardal y Cynllun gynyddu gan hyd at 7,850 o bobl erbyn 2022. Prif nodweddion y newid poblogaeth hwn a’r pryderon cysylltiedig ydi:

• Mae nifer o bobl yn grŵp oed 18-64 yn gostwng gan olygu gostyngiad yn y rheiny sydd yn gweithio ac felly yn effeithio ar berfformiad economaidd y Ardal y Cynllun;
• Mae nifer y bobl oed 65+ yn cynyddu’n sylweddol gan olygu mwy o bwysau ar gyfleusterau gofal cymdeithasol ac iechyd a gwasanaethau a hynny ar draul perfformiad economaidd;
• Rhagwelir gostyngiad sylweddol yn nifer plant ar draul perfformiad economaidd y dyfodol, lefelau disgyblion ysgol a hunaniaeth gymunedol;
• Rhagwelir bydd y nifer o bobl yn byw gyda'i gilydd ar aelwydydd yn lleihau gan olygu angen am dai newydd i gefnogi’r boblogaeth gyfredol a gostyngiad mewn cartrefi o faint teuluol;
• Mae nifer o bobl sydd yn symud i mewn i Ardal y Cynllun yn llawer mwy na’r rheiny sydd yn symud allan gan olygu mwy o angen am dai a chyfleoedd gwaith a;
• Mae nifer y bobl sy’n byw yn y Ardal y Cynllun ac sy’n gweithio mewn lleoliadau y tu allan i’r Ardal y Cynllun yn anghynaladwy gan arwain at yr angen i gynyddu cyfleoedd cyflogaeth lleol.

1.1.2 Mae effaith y newidiadau bwriedig hyn mewn poblogaeth wedi creu nifer o faterion blaenoriaeth i’r Cyngor. Mae angen:

• Lefel twf tai a chyflogaeth gynaliadwy y gellir ei ddarparu a’i gynnal ac sy’n adlewyrchu’r prif newid poblogaeth naturiol, y newid mewn meintiau aelwydydd a’r mewnlifiad net;
• Cyfleoedd cyflogaeth ychwanegol i gyfrannu at leihau’r lefelau sy’n teithio y tu allan i’r sir i weithio
• Annog strwythur oedran mwy cytbwys a hyrwyddo safle economaidd mwy cadarn trwy'r cynnig o dai a gwaith, datblygu sgiliau, creu swyddi a dylunio tai yn greadigol. Tra ar yr un pryd, yn addasu i boblogaeth sy’n heneiddio o ran anghenion iechyd, gofal cymdeithasol, tai a chyflogaeth,
• Cyfrannu at ofynion cyfredol am Angen Lleol am Dai Fforddiadwy (AHLN) ac uchafu’r ddarpariaeth yn y dyfodol;
• Diogelu amgylchedd naturiol ac adeiledig Conwy;
• Diogelu a hyrwyddo’r iaith Gymraeg a hunaniaeth gymunedol;
• Annog datblygiad sy’n ceisio cyflawni amcanion blaenoriaeth y cynllun.

1.1.3 Gan ystyried yr holl ffactorau hyn, mae’r Cyngor yn cynnig lefel twf cynaliadwy sydd yn cynnwys rhwng tua:

• 6,520 o unedau tai newydd gyda lefel 10% wrth gefn o hyd at 7,170 o unedau tai newydd i adlewyrchu newidiadau poblogaeth naturiol, newidiadau mewn meintiau teuluoedd a mewnfudo net
• 2,350 o swyddi newydd gyda lefel wrth gefn o hyd at 2,585 o swyddi newydd i adlewyrchu newidiadau poblogaeth naturiol, newidiadau mewn meintiau teuluoedd a mewnfudo net
• 1,800 swydd gyda lefel wrth gefn o hyd at 1,980 o swyddi newydd i gyfrannu at leihau lefelau cymudo allanol
• 1,875 o unedau tai fforddiadwy newydd (1,000 gan adeiladu o’r newydd)

1.2 Cynllun Datblygu Lleol Conwy (CDLl)

1.2.1 Mae Deddf Cynllunio a Phryniant Gorfodol 2004 yn gorchymyn bod y Cyngor yn paratoi CDLl ar gyfer Ardal y Cynllun sy’n gweithredu fel un fframwaith ar gyfer rheoli datblygu a defnydd tir o fewn ei derfynau gweinyddol. Mae’n amlinelli’r prif heriau sy’n wynebu Conwy, yn nodi’r Weledigaeth, Amcanion a’r Strategaeth Ofodol ar gyfer datblygu'r ardal dros y cyfnod 2007 i 2022. Bydd y CDLl yn cael ei ddefnyddio gan y Cyngor i arwain a rheoli datblygu gan ddarparu’r sail ar gyfer penderfynu ar geisiadau cynllunio. Mae’r CDLl yn cymryd lle’r Cynlluniau Fframwaith presennol a’r Cynlluniau Lleol a oedd yn arfer darparu’r fframwaith bolisi ar gyfer Ardal Cynllun Conwy.

1.2.2 Pwrpas y CDLl yw:

• Darparu sail ymarferol a manwl ar gyfer rheoli datblygu a defnydd tir
• Diogelu’r amgylchedd naturiol ac adeiledig
• Cynnig cymhelliad i ddatblygwyr drwy ddyrannu tir ar gyfer mathau penodol o ddatblygiadau
• Dod â materion cynllunio lleol a manwl ger bron y cyhoedd

1.3 Strwythur y Cynllun

1.3.1 Mae fframwaith y cynllun yn dangos yn glir sut yr ymdrinnir â, ac y cyflawni’r anghenion a’r materion sy’n wynebu Conwy yn 2022.

1.3.2 Mae rhan 2 yn amlinellu amcanion allweddol y Cynllun, gan fanylu sut y dylid mynd i’r afael â thema defnydd tir Strategaeth Gymunedol Conwy a materion allweddol sy’n wynebu Conwy dros gyfnod y Cynllun.

Mae rhan 3 yn cyflwyno Strategaeth Ofdol y Cyngor i gyflawni’r weledigaeth a’r amcanion dros gyfnod y Cynllun.

Mae Rhan 4 yn cynnwys yr egwyddorion datblygu, y polisïau strategol ac ar sail meini prawf a fydd yn cael eu defnyddio wrth benderfynu ar y cynigion datblygu.

Mae Atodiad 1 yn dangos sut y bydd polisïau a safleoedd datblygu penodol yn cael eu cyflwyno, gan gynnwys pa asiantaethau fydd yn cyfrannu tuag at eu darparu.

Mae’r Cynllun Gweithredu yn cynnwys Cynllun Datblygu Graddol, disgrifiadau Safleoedd Strategol a rhestr o’r math o wybodaeth ategol fydd angen ar y cam cais cynllunio ar gyfer pob un o’r safleoedd strategol.

Mae Atodiad 2 yn amlinellu Fframwaith Fonitro’r CDLl, gan ddarparu’r sail ar gyfer adolygu’r Cynllun yn rhannol neu’n llawn a gwneud newidiadau, lle bod angen.

1.3.3 Ategir y CDLl hefyd gan Fap Cynigion sy’n dangos lleoliad daearyddol a graddfa’r datblygiadau ar safleoedd penodol a diogelu polisïau sydd wedi eu dynodi o fewn y CDLl.

1.4 Papurau Cefndir fel Tystiolaeth

1.4.1 Mae amryw o bapurau cefndir a data technegol arall wedi darparu’r sail dystiolaeth ar gyfer y dull a gymerwyd yn y CDLl Conwy hwn (gweler gwefan y Cyngor i gael rhestr ddiffiniol www.conwy.gov.uk/cdll).

1.5 Gwerthusiad o Gynaladwyedd ac Asesiad Amgylcheddol Strategol

1.5.1 Cynhaliwyd Arfarniad Cynaliadwyedd ac Asesiad Amgylcheddol Strategol (SA/SEA) ar CDLl Conwy i sicrhau ei fod yn diwallu amcanion cymdeithasol, economaidd ac amgylcheddol. Mae’r SA/SEA wedi bod yn broses bwysig wrth ddynodi meysydd o newid a mesurau lliniaru i sicrhau bod CDLl Conwy yn gynaliadwy. Cyflwynir canlyniadau’r SA/SEA yn BP/10 sydd ar gael ar wefan y Cyngor www.conwy.gov.uk/cdll.

1.6 Asesiad Cyfarwyddeb Cynefinoedd

1.6.1 Mae’n ofynnol i’r Cyngor gynnal Asesiad Priodol o’i gynlluniau datblygu defnydd tir lle gallai effeithio ar Safleoedd Ewropeaidd (Ardaloedd Cadwraeth Arbennig, Ardaloedd Gwarchodaeth Arbennig a Safleoedd Morol oddi ar yr Arfordir). Cynhaliwyd Ymarferiad Sgrinio Gwerthusiad Rheoliadau Cynefinoedd (HRA) cychwynnol ar CDLl Conwy gan asesu ei effaith cyffredinol, ac mae hwn ar gael ar wefan y Cyngor.

1.7 Statws y Ddogfen a Chanslo Cynlluniau

1.7.1 Pan fabwysiadir y CDLl yn 2013, i bwrpas Adran 38(6) Deddf Cynllunio a Phrynu Gorfodol 2004 bydd y cynlluniau canlynol yn cael eu canslo:

Cynlluniau Fframwaith

• Cynllun Fframwaith Gwynedd a Fabwysiadwyd (1993)
• Cynllun Fframwaith Clwyd – Ail Addasiad (1999)

Cynlluniau Lleol

• Cynllun Lleol Bwrdeistref Colwyn a Fabwysiadwyd (1999)
• Cynllun Ardal Llandudno Conwy (1982)

Cynllun Datblygu Unedol

• Cynllun Datblygu Unedol Drafft Conwy (2001)

Datganiad

• Datganiad Darparu Tai Fforddiadwy

1.8 Fframwaith Polisi

Cynllun Gofodol Cymru

1.8.1 Mae Deddf Cynllunio a Phryniant Gorfodol 2004 a’i reoliadau ategol yn ei gwneud yn ofynnol i CDLl Conwy ystyried Cynllun Gofodol Cymru (WSP). Rhennir y WSP yn chwe Ardal Cynllun Gofodol (SPAs) traws-ffiniol. Mae Ardal Cynllun Conwy yn bennaf o fewn Gogledd Ddwyrain Cymru - SPA y Ffin a’r Arfordir ac ystyrir ei fod yn gwneud cyfraniad pwysig i economi Cymru a’r DU. Mae ffyniant yr Ardal i’r dyfodol wedi’i gysylltu’n agos â Gogledd Orllewin Lloegr yn ogystal â SPA cyfagos Gogledd Orllewin Cymru a Chanolbarth Cymru. Darperir gwybodaeth bellach am y berthynas rhwng y CDLl a’r WSP yn BP/1 ‘Cynlluniau a Strategaethau Perthnasol.’

1.8.2 Mae cynlluniau a strategaethau pwysig cenedlaethol, rhanbarthol a lleol wedi dylanwadu ar gyfeiriad CDLl Conwy. Ceir crynodeb o brif oblygiadau’r materion hyn ar y Cynllun yn BP/1. Er hynny, drwy gydol y CDLl hwn cyfeirir at y dogfennau perthnasol yn y rhesymeg a’r cyfiawnhad dros yr ymagwedd bolisi, lle bod hynny’n briodol.

1.9 Cyd-destun Ardal y Cynllun

1.9.1 Mae Ardal y Cynllun yn cwmpasu ardal o 1,130 km sgwâr ac amcangyfrifir bod poblogaeth breswyl o tua 111,700 o bobl. Mae aneddiadau trefol Ardal y Cynllun, yn bennaf ar hyd y llain arfordirol gul lle mae tua 85% o’r holl boblogaeth yn byw, gyda’r 15% sy’n weddill yn byw mewn aneddiadau gwledig. Mae tua 4% o’r boblogaeth yn byw ym Mharc Cenedlaethol Eryri, tu allan i Ardal y Cynllun. Tref arfordirol Llandudno yw’r ardal gyda’r boblogaeth fwyaf (20,000 o breswylwyr), gyda Chonwy yn agos ar ei ôl (14,200 o breswylwyr), Abergele (10,000 o breswylwyr), Bae Colwyn (9,700 o breswylwyr) a Tywyn a Bae Cinmel (7,800) o breswylwyr), ac mae pob un ohonynt wedi’u gwasanaethu gan gysylltiadau ardderchog ar ffyrdd a rheilffyrdd a gwasanaethau cludiant cyhoeddus sydd wedi hen sefydlu. Mae’r ardal wledig, fewndirol yn bennaf, sy’n weddill yn cynnwys nifer o brif bentrefi a phentrefannau o bwysigrwydd lleol sy’n cynnig cyfleusterau a gwasanaethau allweddol.

1.9.2 MaeArdal y Cynllun yn ardal o dirwedd arbennig sy’n amrywio o draethau tywodlyd a phentiroedd i ddyffrynnoedd cysgodol, rhosydd agored a choetiroedd naturiol sy’n ffinio a mynyddoedd Parc Cenedlaethol Eryri. Mae sawl ardal o Dirwedd Hanesyddol yn ogystal â phum safle cadwraeth natur dynodedig o bwysigrwydd rhyngwladol. Mae Ardal y Cynllun hefyd yn cynnwys nifer o safleoedd dynodedig lleol sy’n cyfrannu at gymeriad cyffredinol ac ansawdd yr amgylchedd naturiol.

1.9.3 Yn gyffredinol, mae’r economi’n dibynnu’n drwm ar dwristiaeth a diwydiannau gwasanaethau a hynny’n bennaf yn yr aneddiadau arfordirol trefol ac atyniad yr ardal wledig. Mae cyflogaeth ddiwydiannol er ei bod wedi ei leoli’n bennaf ac wedi ei chyfyngu i ryw raddau ger yr arfordir, yn cynnwys gwaith cynhyrchu ac ymchwil, ac mae i’w chanfod mewn lleoedd megis Bae Cinmel, Bae Colwyn a Chyffordd Llandudno. Mae amaethyddiaeth a choedwigaeth yn weithgareddau cyflogi pwysig yn yr ardaloedd gwledig lle siaredir Cymraeg yn bennaf. Mae rhai o’r pentrefi gwledig yma naill ai yn rhannol neu’n gyfan gwbl o fewn y Parc Cenedlaethol.

1.9.4 Mae Llandudno yn gyrchfan glan môr Fictoraidd draddodiadol, sy’n cyfuno ei rôl dwristaidd gyffrous gyda chanolfan fasnach ffyniannus ac yn gweithredu fel canolfan siopa is rhanbarthol ar gyfer yr ardal. Un o’r aneddiadau mwyaf yw Bae Colwyn ac mae ganddo rôl gynyddol bwysig yn y sector masnachol a busnes. Mae Canol Tref Conwy o fewn safle Treftadaeth y Byd dynodedig ac mae’n bwysig o ran y cyfraniad a wna at yr economi twristaidd, tra bo Cyffordd Llandudno yn datblygu fel lleoliad pwysig i swyddfeydd a buddsoddiad o’r sector busnes. Mae aneddiadau eraill yn cynnwys Llanfairfechan a Phenmaenmawr i’r gorllewin a threfi Abergele a Bae Cinmel i’r dwyrain.

1.9.5 Mae Conwy yn wynebu’r her o wella cyflyrau economaidd cymdeithasol mewn ardaloedd o ddirywiad economaidd lle mae amddifadiad aml, fel Bae Colwyn. Er mwyn cwrdd â’r her hon, dynodwyd Ardal Adfywio Strategol (SRA) i feithrin cymhelliant economaidd a chymdeithasol yng nghanol a dwyrain Conwy. Mae’r SRA yn estyn ymhell ac mae’n crwydro i sir gyfagos Sir Ddinbych.

1.10 Y Prif Faterion yng Nghonwy

1.10.1 Er mwyn sicrhau sylfaen gadarn ar gyfer strategaeth ddatblygu’r cynllun, gwnaed arolwg o’r wybodaeth gymdeithasol, economaidd ac amgylcheddol ar gael ar gyfer y materion oedd yn effeithio ar Ardal y Cynllun.

1.10.2 Mae mwy o fanylion am y materion hyn yn Adroddiad Ymgynghorol CDLla phapur cefndir BP/1 ar gael ar wefan y Cyngor ar www.conwy.gov.uk/cdll.

1.11 Y Materion sy’n Wynebu Conwy

1.11.1 Yn y tabl isod ceir rhestr o’r materion blaenoriaeth, eu ffynhonnell, a chanlyniadau cysylltiedig o Strategaeth Gymunedol ‘Un Conwy’, amcan gofodol cysylltiedig â pholisïau perthnasol y CDLl hwn i ymdrin â’r mater.